لاہور ( اے بی این نیوز ) سانحہ بھاٹی گیٹ کے بعد آئی جی پنجاب کی ہدایت پر تشکیل دی گئی ہائی پاور کمیٹی نے اپنی انکوائری رپورٹ مکمل کر لی ہے۔ آئی جی پنجاب نے واقعے کے بعد تشدد کے معاملات کی تحقیقات کے لیے ایک 3 رکنی کمیٹی بنائی تھی، جس کی سربراہی ایڈیشنل آئی جی آئی اے بی عمران محمود نے کی۔ کمیٹی کے دیگر اراکین میں ڈی آئی جی احمد ناصر عزیز ورک اور ڈی آئی جی عمران کشور شامل تھے۔
ذرائع کے مطابق کمیٹی کے تمام افسران نے جائے وقوعہ کا دورہ کیا اور شواہد اکٹھے کیے۔ ساتھ ہی متوفیہ سعدیہ اور ان کی بیٹی ردا کے اہل خانہ کے بیانات بھی قلمبند کیے گئے۔ تحقیقات کے دوران یہ بات سامنے آئی کہ ایس پی سٹی، ایس ڈی پی او اور ایس ایچ او کی غفلت واقعے میں ملوث تھی۔ کمیٹی نے یہ بھی نوٹ کیا کہ ایس پی کی موجودگی میں متوفیہ خاتون کے شوہر پر ایس ایچ او کے ریٹائرنگ روم میں تشدد کیا گیا۔
ان تحقیقات کے بعد کمیٹی نے تینوں اعلیٰ پولیس افسران کو غفلت کا مرتکب قرار دیا اور اپنی سفارشات آئی جی پنجاب کو بھیج دی ہیں۔ حتمی کارروائی اور افسران کے خلاف فیصلے کا اختیار آئی جی پنجاب کے پاس ہے، جو آنے والے دنوں میں اس پر اعلان کریں گے۔
مزید پڑھیں :مظفرآباد ، چانگن میں لینڈ سلائیڈنگ ، شاہراہ نیلم مکمل طور پر بند کر دی گئی
