اسلام آباد(اے بی این نیوز)نیشنل ڈیزاسٹر مینجمنٹ اتھارٹی(این ڈی ایم اے )نے گلگت بلتستان، آزاد کشمیر اور بلوچستان میں ممکنہ بارش اور برفباری کا الرٹ جاری کر دیا۔ جاری الرٹ کے مطابق بلوچستان کے بیشتر اضلاع میں آئندہ 24 سے 48 گھنٹوں کے دوران وقفے وقفے سے بارش متوقع ہے۔ژوب، قلعہ سیف اللہ، زیارت، پشین، کوئٹہ اور گردونواح میں بارش کا امکان ہے۔
ادھرگلگت بلتستان اور آزاد کشمیر میں بارش اور پہاڑی علاقوں میں برفباری متوقع ہے۔اسکردو، ہنزہ، غذر، استور، دیامر اور شگر میں بارش و برفباری کا امکان ہے۔ این ڈی ایم اے نے کہا ہے کہ برفباری کے دوران پہاڑی علاقوں میں سڑکوں پر پھسلن ٹریفک کی روانی متاثر کر سکتی ہے۔پہاڑی علاقوں میں سفر کے دوران محتاط رہیں اور حفاظتی تدابیر اپنائیں۔
پرانے اور کمزور ٹائروں کے ساتھ گاڑی کو پہاڑی علاقوں میں ہر گز نہ لے کر جائیں۔ پہاڑی علاقوں میں غیر ضروری سفر سے گریز کریں۔ این ڈی ایم اے نے مزید کہا ہے کہ برفباری کے دوران سفر نہایت ضروری ہو تو ضروری سامان بشمول سنو چین اور اضافی فیول وغیرہ کی دستیابی یقینی بنائیں۔ممکنہ متاثرہ علاقوں میں سفر کے دوران انتظامیہ کے ساتھ تعاون، ہدایات پر عمل کریں اورموسمی صورتحال سے آگاہ رہیں۔
این ڈی ایم اے نے موسمی صورتحال اور ممکنہ خطرات کے پیش نظر صوبائی و ضلعی انتظامیہ کو الرٹ رہنے اور پیشگی اقدامات کی ہدایت کردی۔
مزید پڑھیں۔سونے کے نرخ میں آج بھی بڑا اضافہ، قیمت تاریخی بلندی پر پہنچ گئی
