اسلام آباد(اے بی این نیوز)پاکستان بھر میں شدید سردی کی لہر برقرار ہے جبکہ برفباری اور بارش برسانے والا ایک اور طاقتور سسٹم آج ملک میں داخل ہونے کی پیشگوئی کی گئی ہے۔
محکمہ موسمیات کے مطابق مغربی ہواؤں کا نیا سلسلہ آج رات سے ملک کے مختلف حصوں کو متاثر کرے گا، جس کے نتیجے میں بارشوں اور برفباری کا نیا اسپیل شروع ہونے کا امکان ہے۔
محکمہ موسمیات کا کہنا ہے کہ اس سسٹم کے تحت بلوچستان، خیبر پختونخوا، گلگت بلتستان اور کشمیر میں بارش اور پہاڑوں پر برفباری متوقع ہے۔ اس کے علاوہ مری، گلیات، اسلام آباد، راولپنڈی اور لاہور سمیت پنجاب کے مختلف علاقوں میں بھی بارش اور برفباری ہو سکتی ہے، جبکہ 25 سے 26 جنوری کے دوران سندھ کے بعض علاقوں میں بارش کا امکان ظاہر کیا گیا ہے۔
ادھر بلوچستان میں آج رات سے 27 جنوری تک بارش اور برفباری کا سلسلہ جاری رہنے کی توقع ہے۔ محکمہ موسمیات کے مطابق کوئٹہ، گوادر، جیوانی، پسنی، اورماڑہ، خضدار، کیچ، تربت، چاغی، تفتان، نوکنڈی، دالبندین، پنجگور، قلات، واشک، سوراب، ژوب، مستونگ، خاران، قلعہ سیف اللہ، نوشکی، لورالائی، موسیٰ خیل اور آواران میں تیز ہواؤں اور گرج چمک کے ساتھ بارش کا امکان ہے۔
محکمہ موسمیات نے بتایا کہ جیوانی، پسنی، خضدار، آواران، چاغی، پنجگور اور کیچ کے بعض علاقوں میں شدید بارش ہو سکتی ہے، جبکہ کچھی، سبی، زیارت، ہرنائی، دکی، لورالائی اور لسبیلہ میں ہلکی بارش متوقع ہے۔
اسی طرح زیارت، چمن، پشین، ہرمازئی، خانوزئی اور کان مہترزئی میں برفباری کا امکان ظاہر کیا گیا ہے، جبکہ مسلم باغ، لوئی بند، قلعہ عبداللہ، گلستان اور دوبندی میں ہلکی سے معتدل برفباری کے ساتھ تیز ہوائیں چلنے کی پیشگوئی کی گئی ہے۔
محکمہ موسمیات نے خبردار کیا ہے کہ شدید بارش کے باعث گوادر، جیوانی، پسنی، آواران، چاغی اور کیچ کے شہری ندی نالوں اور پہاڑی علاقوں میں سیلابی صورتحال پیدا ہو سکتی ہے، جس کے پیش نظر مقامی انتظامیہ اور متعلقہ اداروں کو پیشگی حفاظتی اقدامات مکمل کرنے کی ہدایت جاری کر دی گئی ہے۔
مزید پڑھیں۔مجھے نااہل کرنے کی منصوبہ بندی کی جارہی ہے: سہیل آفریدی
