اسلام آباد ( اے بی این نیوز )قائد حزب اختلاف اور چیئرمین تحریک تحفظ آئین پاکستان محمود خان اچکزئی نے کہا ہے کہ ہم شریف ضرور ہیں لیکن اتنے لاعلم نہیں کہ یہ نہ سمجھ سکیں کہ ہمارے حق پر ڈاکہ کس نے ڈالا اور یہ غیر آئینی ترامیم کون لا رہا ہے۔میڈیا سے گفتگو کرتے ہوئے محمود خان اچکزئی نے کہا کہ ہم جمہوریت کے سلوگن کو تمام تر مراعات پر فوقیت دیتے ہیں۔ انہوں نے واضح کیا کہ عمران خان کا ساتھ دے کر ہم کوئی احسان نہیں کر رہے بلکہ مظلوم کے ساتھ کھڑے ہونا ہمارا اخلاقی اور سیاسی فرض ہے۔
انہوں نے بتایا کہ 8 فروری کو یومِ احتجاج کے طور پر اس لیے منتخب کیا گیا کیونکہ اسی دن عوام کے ساتھ ناانصافی ہوئی۔ ان کے مطابق عمران خان کی جماعت کا مینڈیٹ چھینا گیا اور اقلیتی نشستیں خیرات کی طرح بانٹ دی گئیں۔ اگر واقعی جمہوری مزاج ہوتا تو سیاسی جماعتیں ان نشستوں کو لینے سے انکار کر دیتیں۔
محمود خان اچکزئی نے کہا کہ لاکھوں لوگ اگر منظم ہوں تو کوئی انہیں نہیں روک سکتا۔ لنڈی کوتل، چارسدہ، مردان، کوئٹہ، ژوب، لورالائی یا کراچی ہو، اگر نظم و ضبط ہو تو طاقت خود بولتی ہے۔ انہوں نے مزید کہا کہ اگر کسی کو ظلم سے محبت ہے تو بے شک ہمارے ساتھ شامل نہ ہوں۔
انہوں نے ایک بار پھر دوٹوک انداز میں کہا کہ ہم شریف ضرور ہیں مگر اتنے لاعلم نہیں کہ یہ نہ پہچان سکیں کہ غیر آئینی ترامیم کون لا رہا ہے اور عوام کے حقوق پر کس نے ڈاکہ ڈالا ہے۔ ان کا کہنا تھا کہ جمہوریت اور آئین کے تحفظ کے لیے جدوجہد جاری رکھی جائے گی اور عوامی طاقت کے ذریعے حق واپس لیا جائے گا۔
مزید پڑھیں :ملک کے مختلف شہروں میں موسلا دھار بارش،برفباری کا سلسلہ جاری،درجنوں فیڈرز ٹرپ کر گئے
