اسلام آباد (اے بی این نیوز ) پیر کو اسلام آباد اور خیبرپختونخوا کے مختلف علاقوں میں زلزلے کے شدید جھٹکے محسوس کیے گئے، جس سے شہریوں میں خوف و ہراس پھیل گیا اور لوگ گھروں اور دفاتر سے باہر نکل آئے۔زلزلہ پیما مرکز کے مطابق زلزلے کی شدت ریکٹر اسکیل پر5.8 ریکارڈ کی گئی جبکہ اس کی گہرائی تقریباً 10 کلومیٹر تھی۔ زلزلے کا مرکز کشمیر کے شمال مغربی حصے میں بتایا جا رہا ہے۔
زلزلے کے جھٹکے اسلام آباد، راولپنڈی اور خیبرپختونخوا کے کئی اضلاع میں محسوس کیے گئے۔ اس کے علاوہ ہنزہ اور اس کے گرد و نواح میں بھی زلزلہ خاصی شدت سے آیا، جبکہ سوات میں ہلکے جھٹکے رپورٹ ہوئے۔تاحال کسی جانی یا بڑے مالی نقصان کی اطلاع نہیں ملی، تاہم احتیاط کے طور پر شہریوں نے عمارتوں سے باہر نکل کر کھلے مقامات کا رخ کیا۔ ریسکیو اور ایمرجنسی ادارے الرٹ رہے اور صورتِ حال پر مسلسل نظر رکھی گئی۔
زلزلہ پیما ادارے نے عوام کو ہدایت کی ہے کہ وہ محفوظ مقامات پر رہیں، غیر ضروری نقل و حرکت سے گریز کریں اور آفٹر شاکس کی صورت میں احتیاطی تدابیر اختیار کریں۔ماہرین کے مطابق پاکستان ایک زلزلہ خیز خطے میں واقع ہے، اس لیے عوام کو ہر وقت ممکنہ قدرتی آفات کے لیے تیار رہنا چاہیے۔ یہ واقعہ ایک بار پھر یاد دہانی ہے کہ حفاظتی اقدامات اور آگاہی کتنی ضروری ہے۔
مزید پڑھیں :ایران کے سپریم لیڈر کی زندگی خطرے میں، کون ٹارگٹ بنا ئے گا،سابق امریکی سفیرسے سب کچھ بتا دیا،جا نئے تفصیلات
