اسلام آباد(اے بی این نیوز)پاکستان میں سال 2025 کے دوران 5.5 ملین سے زائد پاسپورٹس جاری کیے گئے، جو پاسپورٹ کے اجرا میں نمایاں اضافہ اور خدمات میں بہتری کی عکاسی کرتا ہے۔
ڈائریکٹر جنرل، امیگریشن اینڈ پاسپورٹس کی سالانہ کارکردگی رپورٹ کے مطابق جاری کیے گئے پاسپورٹس میں 3.2 ملین نارمل، 1.8 ملین ارجنٹ اور 276,000 فاسٹ ٹریک سروس کے تحت جاری کیے گئے پاسپورٹس شامل ہیں۔
رپورٹ میں بتایا گیا کہ شہریوں میں الیکٹرانک پاسپورٹس کی جانب رجحان میں اضافہ دیکھنے میں آیا، جس کے باعث بڑی تعداد میں درخواست دہندگان نے روایتی پاسپورٹس کے بجائے اس سہولت کو ترجیح دی۔
محکمے کے مطابق یہ پیش رفت ڈائریکٹر جنرل پاسپورٹس کی سربراہی میں کی گئی اصلاحات کا نتیجہ ہے، جو وزیرِاعظم شہباز شریف اور وزیرِداخلہ محسن نقوی کی ہدایات کی روشنی میں نافذ کی گئیں۔ جدید پرنٹنگ مشینوں کی تنصیب کے ذریعے پاسپورٹ درخواستوں کا طویل عرصے سے موجود بیک لاگ ختم کر دیا گیا۔
رپورٹ میں بتایا گیا کہ پہلی بار 24/7 پاسپورٹ پروسیسنگ اور ڈیلیوری سروس متعارف کرائی گئی، جس کے تحت شہری کسی بھی وقت پاسپورٹ کے لیے درخواست دے سکتے ہیں۔ اس کے علاوہ پاسپورٹ ہیڈکوارٹرز اور مختلف علاقائی دفاتر کی تزئین و آرائش بھی مکمل کی گئی، جس سے عوام کو بہتر سہولیات فراہم کی جا رہی ہیں۔
رپورٹ کے مطابق سال 2025 میں بیرونِ ملک مقیم پاکستانیوں کے لیے بھی سہولیات میں اضافہ کیا گیا۔ پاکستان کے سفارت خانوں میں ون ونڈو سروس کے آغاز سے پاسپورٹ سے متعلق امور کو آسان بنایا گیا، جبکہ بہتر سیکیورٹی خصوصیات کے حامل نئے پاسپورٹ بُک کی تیاری اور ملک بھر میں پاسپورٹ دفاتر و کاؤنٹرز کے دائرہ کار میں توسیع بھی کی گئی۔
مزید پڑھیں۔بلوچستان میں آٹے کا شدید بحران، قیمتوں میں ہوشربا اضافہ
