تہران( اے بی این نیوز )ایران کی جانب سے سابق امریکی صدر ڈونلڈ ٹرمپ کی تہران کو دی گئی سخت دھمکیوں پر بھرپور اور دوٹوک ردعمل سامنے آ گیا ہے۔ ایرانی صدر مسعود پزشکیان نے واضح الفاظ میں کہا ہے کہ اگر ایران کے خلاف کسی بھی قسم کی جارحیت کی گئی تو اس کا جواب نہایت سخت اور فیصلہ کن ہوگا۔
صدر مسعود پزشکیان کا کہنا تھا کہ ایران اپنی خودمختاری اور قومی سلامتی کے دفاع کی مکمل صلاحیت رکھتا ہے۔ انہوں نے زور دیا کہ ملک کے دفاع کے لیے تمام ضروری اقدامات کیے جائیں گے اور کسی بھی ممکنہ خطرے کا مؤثر اور بھرپور مقابلہ کیا جائے گا۔ ان کے مطابق ایران دباؤ، دھمکیوں یا طاقت کے استعمال سے مرعوب ہونے والا نہیں ہے۔
یہ ردعمل ایسے وقت میں سامنے آیا ہے جب ڈونلڈ ٹرمپ نے ایک بار پھر ایران کو جوہری پروگرام کے حوالے سے سخت وارننگ دی ہے۔ فلوریڈا میں اسرائیلی وزیراعظم بنیامین نیتن یاہو سے ملاقات کے بعد میڈیا سے گفتگو کرتے ہوئے ٹرمپ نے دعویٰ کیا کہ ایران دوبارہ جوہری تنصیبات کی تعمیر میں مصروف ہے۔ ان کا کہنا تھا کہ اگر یہ سرگرمیاں نہ رکیں تو امریکا ممکنہ طور پر فوری حملوں کی حمایت کرے گا۔
ٹرمپ نے مزید کہا کہ ایران کی جانب سے جوہری پروگرام کی بحالی کی صورت میں اسے تباہ کرنا ناگزیر ہو جائے گا۔ ان کے مطابق ایران کو کسی معاہدے پر آ جانا چاہیے، تاہم انہوں نے یہ بھی تسلیم کیا کہ بعض اوقات سفارتی کوششیں مطلوبہ نتائج نہیں دے پاتیں۔
مزید پڑھیں :سونا اپ ڈیٹ،تاریخی سستا
