اسلام آباد(اے بی این نیوز)پاکستان ٹیلی کمیونی کیشن اتھارٹی ( پی ٹی اے) نے پاکستان ٹیلی کمیونی کیشن کمپنی لمیٹڈ ( پی ٹی سی ایل) کو ٹیلی نار پاکستان پرائیویٹ لمیٹڈ کے حصول کے لیے نو آبزرویشن سرٹیفیکیٹ ( این او سی) جاری کر دیا ہے۔
تفصیلات کے مطابق، پی ٹی اے کی جانب سے یہ این او سی پاکستان کے ٹیلی کمیونی کیشن شعبے میں مسابقت، صارفین کے حقوق کی حفاظت اور مارکیٹ پر اثرات کی تفصیلی جانچ کے بعد جاری کیا گیا۔
ہفتہ کو پی ٹی اے کی طرف سے جاری کردہ بیان میں کہا گیا کہ پی ٹی اے نے اس مجوزہ ٹرانزیکشن کا گہرائی سے جائزہ لیا، جس میں مارکیٹ کی مسابقت، صارفین کے تحفظات اور ٹیلی کام کے شعبے پر مجموعی اثرات کو مدنظر رکھا گیا۔ اس جائزے کے دوران، قواعد و ضوابط کی مکمل پاسداری کو یقینی بنانے کے لیے مختلف متعلقہ حکومتی اداروں سے مشاورت بھی کی گئی۔
این او سی کے اجراء کے بعد، پی ٹی سی ایل کو قانونی اور تجارتی تقاضوں کے مطابق حصول کے اگلے مراحل میں پیشرفت کرنے کی اجازت مل گئی ہے۔ دونوں کمپنیاں اس منتقلی کے دوران خدمات کی بلا تعطل فراہمی، معیارِ خدمات (کیو او ایس) اور لائسنس کی تمام شرائط پر مکمل عملدرآمد کو یقینی بنائیں گی۔
پی ٹی اے نے واضح کیا کہ وہ اس پورے عمل کی سخت نگرانی کرے گا تاکہ صارفین کے حقوق کا مؤثر تحفظ کیا جا سکے اور پاکستان کے ٹیلی کام سیکٹر کی مسابقتی، مستحکم اور جدید تقاضوں کے مطابق ترقی کو ممکن بنایا جا سکے۔
مزید پڑھیں: پیٹرولیم مصنوعات کی قیمتوں میں اضافے کا امکان
