پشاور ( اے بی این نیوز )وزیراعلیٰ خیبرپختونخوا سہیل آفریدی نے اعلان کیا ہے کہ وہ این ایف سی ایوارڈ کی میٹنگ میں شرکت کریں گے۔سہیل آفریدی نے کہا کہ پارلیمانی پارٹی کے اجلاس میں فیصلہ ہوا کہ وہ این ایف سی میٹنگ میں صوبے کے حقوق کے لیے بات کریں گے۔ انہوں نے کہا کہ قبائلی اضلاع 2018 میں خیبرپختونخوا میں ضم ہوئے، مگر ان کا حصہ صوبے کو مالی طور پر نہیں دیا گیا۔
وزیراعلیٰ نے یہ بھی اعلان کیا کہ وہ 7 دسمبر کو صوبے میں جلسہ کریں گے اور این ایف سی ایوارڈ میں 2018 سے 2025 تک خیبرپختونخوا کے حصہ کی بازیابی کے لیے اقدامات کریں گے۔ ان کا کہنا تھا کہ یہ صوبے کا حق ہے اور تمام مکاتب فکر کو این ایف سی پر بات کرنے کا حق حاصل ہے۔وفاقی وزارت خزانہ کے مطابق 11 ویں نیشنل فنانس کمیشن (این ایف سی) کا ابتدائی اجلاس 4 دسمبر 2025 کو ہوگا، جس میں چاروں صوبے اپنی مالی صورت حال اور بجٹ ضروریات پر بریفنگ دیں گے۔
این ایف سی ایوارڈ پاکستان کا آئینی و مالیاتی نظام ہے، جس کے ذریعے وفاق اور صوبوں کے درمیان آمدنی اور وسائل تقسیم کیے جاتے ہیں۔ اس نظام کا آغاز 1974 میں ہوا، جب آئین پاکستان کے آرٹیکل 160 کے تحت صوبوں اور وفاق کے درمیان مالیاتی شراکت داری کو منظم کرنے کے لیے پہلا کمیشن قائم کیا گیا۔
مزید پڑھیں :قائد حزب اختلاف کون،اہم فیصلہ کر لیا گیا،جا نئے
