پشاور (اے بی این نیوز) وزیراعلیٰ خیبرپختونخوا سہیل آفریدی کا کہنا ہے کہ ہمارے جوانوں کو شہید کرنے والا دہشت گرد ہے، دہشت گردی کے خاتمے کے سوا کوئی چارہ نہیں۔
صحافیوں سے گفتگو کرتے ہوئے وزیراعلیٰ کے پی کا کہنا تھا کہ خیبرپختونخوا پولیس پوری طرح اہل ہے اور دہشت گردوں سے نمٹنے کی پوری صلاحیت رکھتی ہے، میں نے پولیس کے لیے جدید آلات کی خریداری کی منظوری دے دی ہے۔
انہوں نے کہا کہ اگر وفاقی حکومت واجبات ادا کردے تو ہم پولیس اور صحت سمیت تمام شعبوں میں مزید بہتری لاسکتے ہیں، خیبرپختونخوا میں فرانزک لیب قائم کی جائے گی۔
ایک سوال کے جواب میں وزیراعلیٰ کے پی نے کہا کہ پی ٹی آئی کچھ کر رہی ہے، تب ہی خیبرپختونخوا کے عوام نے انہیں تیسرا موقع دیا، موجودہ چیف سیکرٹری اور آئی جی بہترین کام کر رہے ہیں، میں چاہتا ہوں کہ موجودہ آئی جی کام کرتے رہیں۔
پختونخوا میں کرپشن کے الزامات کے حوالے سے سوال پر سہیل آفریدی نے کہا کہ میں وفاقی حکومت کو دعوت دیتا ہوں کہ وہ خیبرپختونخوا کا آڈٹ کرے لیکن ہمارے واجبات بھی ادا کرے، اگر میرا بھائی بھی کرپشن میں ملوث ہے تو اسے سزا ملنی چاہیے۔
سہیل آفریدی نے کہا کہ دہشت گردی نے خیبرپختونخوا کا ہر شعبہ متاثر کیا ہے۔ جو ہمارے فوجیوں کو شہید کرتا ہے وہ دہشت گرد ہے۔ امن کے قیام کے لیے وفاقی حکومت کا ساتھ دوں گا۔ ہم امن و امان پر کوئی سمجھوتہ نہیں کریں گے۔
انہوں نے کہا کہ دہشت گردوں کو سزا دینے کے لیے صوبائی سطح پر قانون سازی کرنے کی ہدایات دی گئی ہیں۔ ہم انسداد دہشت گردی کے قوانین میں خامیوں کو ختم کرنا چاہتے ہیں۔
ایک سوال کے جواب میں کے پی کے وزیر اعلیٰ نے کہا کہ سیاسی اختلافات سے صوبوں کے عوام کو کوئی تکلیف نہیں ہونی چاہیے۔ جنید اکبر کا پانی بند کرنے کا بیان غلط تھا۔ دہشت گردی کے خاتمے کے سوا کوئی چارہ نہیں۔ خدا نہ کرے، پنجاب کو بھی دہشت گردی کا سامنا ہے۔
مزید پڑھیں:مکان کی چھت گرنے سے 5 افراد جاں بحق، 3 زخمی
