بھارت(اے بی این نیوز)مشہور اداکارہ کاجول اور ٹوئنکل کھنہ نے اپنے نئے شو ٹو مچ ود کاجول اینڈ ٹوئنکل میں ایک ایسا جملہ کہہ دیا جس نے سوشل میڈیا اور شوبز انڈسٹری میں بحث چھیڑ دی۔ ان کا کہنا تھا کہ شادیوں کی بھی ایک ’’ایکسپائری ڈیٹ‘‘ ہونی چاہیے تاکہ کوئی زیادہ عرصے تک نہ سہے اور چاہے تو اسے ’’ری نیو‘‘‘کر لے ۔
یہ بیان ایک ہلکے پھلکے مگر دلچسپ مرحلے دس اور دیٹ کے دوران سامنے آیا، جہاں کاجول کے ساتھ ٹوئنکل کھنہ، وکی کوشل اور کریتی سینن موجود تھے۔ کاجول کا موقف تھا اگر شادی کی مدت طے ہو تو تکلیف لمبی نہیں رہتی۔ جب ٹوئنکل کھنہ نے سوال کیا کہ کیا شادی کی کوئی ایکسپائری ڈیٹ ہونی چاہیے؟ ، تو سب مہمانوں میں صرف کاجول نے ہاں میں سر ہلایا۔
انہوں نے کہا کہ میں بالکل مانتی ہوں، آخر کیا ضمانت ہے کہ آپ نے صحیح وقت پر صحیح انسان سے شادی کی؟ اگر ایکسپائری ڈیٹ ہو تو کوئی زیادہ عرصے تک نہ سہے اور اگر رشتہ اچھا ہو تو ری نیو کر لیں۔
اس پر ٹوئنکل نے ہنستے ہوئے کہا کہ یہ شادی ہے ،واشنگ مشین نہیں! اسی شو میں اگلا سوال تھا: کیا پیسہ خوشی خرید سکتا ہے؟ اس بار ٹوئنکل اور وکی کوشل نے اتفاق کیا، لیکن کاجول پھر مخالفت میں کھڑی ہو گئیں۔ انہوں نے کہا کہ پیسہ جتنا بھی ہو، بعض اوقات وہ خوشی کے احساس کو مٹا دیتا ہے جبکہ کریتی سینن نے کہا کہ ہو سکتا ہے تھوڑی خوشی تو خریدی جا سکتی ہے۔
شو کے آخری حصے میں ماحول مزید شوخ ہوگیا جب ٹوئنکل نے کہا کہ دوستی میں ایک اصول ہونا چاہیے بہترین دوست ایک دوسرے کے سابق پارٹنر سے ڈیٹ نہ کریں! ساتھ ہی کاجول کے کندھے پر ہاتھ رکھ کر ہنستے ہوئے بولیں کہ ہم دونوں کا ایک سابق مشترکہ دوست ہے مگر نام نہیں بتائیں گے! کاجول نے قہقہہ لگاتے ہوئے کہا کہ چپ رہو ٹوئنکل! ٹو مچ ود کاجول اینڈ ٹوئنکل کا انداز عام ٹاک شوز سے مختلف ہے، اس میں غیر رسمی گفتگو، مزاح اور ذاتی انکشافات سب ایک ساتھ ہوتے ہیں۔
پہلے کے ایپی سوڈز میں سلمان خان، عامر خان، عالیہ بھٹ اور ورن دھون جیسے بڑے نام بھی شامل ہو چکے ہیں۔ کاجول اور ٹوئنکل کی جوڑی ناظرین کو دو سہیلیوں کی بے ساختہ بات چیت کا احساس دلاتی ہے اور یہی اس شو کو منفرد بناتی ہے۔ نئے شوجس میں وکی کوشل اور کریتی سینن شامل ہیں اب ایمیزون پرائم ویڈیو پر دستیاب ہے۔
مزید پڑھیں۔سعودی عرب : بیشتر علاقوں میں جمعہ سے پیر تک بارش کا امکان
