دبئی ( اے بی این نیوز ) آئی سی سی رینکنگ اپ ڈیٹ میں پاکستانی کھلاڑیوں نے شاندار کارکردگی دکھا کر نمایاں فائدہ حاصل کر لیا ہے، جس سے اگلے سال ہونے والے ٹی ٹوئنٹی ورلڈ کپ سے قبل قومی ٹیم کے حوصلے بلند ہو گئے ہیں۔
2025 میں پاکستان نے اپنی پانچ دو طرفہ سیریز میں سے چار میں کامیابی حاصل کی، جس میں حالیہ ترین جیت جنوبی افریقہ کے خلاف ہوم سیریز میں 2-1 سے ملی۔ اسی کارکردگی کا صلہ اب کھلاڑیوں کو رینکنگ میں بہتری کی صورت میں ملا ہے۔
قومی ٹیم کے کپتان بابر اعظم نو درجے ترقی کے بعد 30ویں نمبر پر آ گئے ہیں، جب کہ اوپنر صائم ایوب نے 10 درجے ترقی پا کر 39ویں پوزیشن حاصل کی۔ آل راؤنڈر سلمان آغا بھی 10 درجے بہتری کے ساتھ 54ویں نمبر پر پہنچ گئے ہیں۔
ویسٹ انڈیز کے کپتان شائی ہوپ دو درجے ترقی کے بعد 12ویں، جب کہ بنگلہ دیش کے تنزید حسن 20 درجے چھلانگ لگا کر 17ویں نمبر پر آ گئے۔ افغانستان کے رحمان اللہ گرباز اور ابراہیم زدران نے بھی رینکنگ میں بالترتیب تین اور چھ درجے ترقی کی۔
بولرز کی تازہ ترین فہرست میں آسٹریلیا کے جوش ہیزل ووڈ دو درجے ترقی کر کے 10ویں پوزیشن پر پہنچ گئے ہیں، جب کہ بنگلہ دیش کے مجیب الرحمان اور مہدی حسن نے بھی نمایاں بہتری حاصل کی ہے۔ ویسٹ انڈیز کے جیسن ہولڈر اور روسٹن چیس بھی ٹاپ 40 بولرز میں شامل ہو گئے ہیں۔
زمبابوے کے تجربہ کار آل راؤنڈر سکندر رضا نے اپنی شاندار فارم برقرار رکھتے ہوئے آل راؤنڈرز کی رینکنگ میں تین درجے ترقی کے ساتھ دوسری پوزیشن حاصل کر لی ہے، جب کہ روسٹن چیس تیسرے نمبر پر آ گئے ہیں۔
سکندر رضا نے حال ہی میں صرف 33 گیندوں پر سنچری بنا کر مردوں کے ٹی ٹوئنٹی انٹرنیشنل کی دوسری تیز ترین سنچری کا ریکارڈ برابر کیا، جس نے انہیں عالمی سطح پر پھر سے نمایاں کر دیا۔
ون ڈے رینکنگ میں نیوزی لینڈ کے ڈیرل مچل نے انگلینڈ کے خلاف شاندار کارکردگی دکھاتے ہوئے تیسرے نمبر پر جگہ بنائی ہے۔ دوسری جانب انگلینڈ کے فاسٹ بولر جوفرا آرچر بھی دو درجے ترقی کے بعد بولرز کی فہرست میں تیسرے نمبر پر آ گئے ہیں۔
مزید پڑھیں :
