پشاور( اے بی این نیوز)خیبرپختونخوا اسمبلی سیکرٹریٹ نے وزیراعلیٰ کے انتخاب کا باقاعدہ شیڈول جاری کر دیا ہے۔
خیبرپختونخوا اسمبلی سیکریٹریٹ کی جانب سے جاری کردہ شیڈول کے مطابق انتخابی عمل 3 مراحل پر مشتمل ہوگا جو 12 اور 13 اکتوبر کو مکمل ہوگا۔
نوٹس کے مطابق وزیر اعلیٰ کے امیدواروں کے نامزدگی فارم 12 اکتوبر بروز اتوار سہ پہر 3 بجے تک اسمبلی سیکرٹری کے دفتر میں جمع کرائے جاسکتے ہیں، امیدوار کے کاغذات نامزدگی پر تجویز کنندہ، حمایتی اور امیدوار کے اپنے دستخط ہونا ضروری ہیں۔ سپیکر خیبرپختونخوا اسمبلی اسی دن شام 4 بجے موصول ہونے والے کاغذات نامزدگی کی جانچ پڑتال کریں گے۔
انتخابات کے لیے اسمبلی کا اجلاس 13 اکتوبر بروز پیر صبح 10 بجے طلب کیا گیا ہے، ووٹنگ شروع ہونے سے قبل اسپیکر اسمبلی ہال میں پانچ منٹ کے لیے گھنٹیاں بجانے کی ہدایت کریں گے، جس کے بعد دروازے بند کر دیے جائیں گے اور کسی کو اندر جانے یا جانے کی اجازت نہیں ہوگی۔
اراکین اسمبلی اپنے ووٹ کا اندراج اپنے ڈویژن نمبر کے مطابق کریں گے، ووٹنگ مکمل ہونے کے بعد ووٹوں کی گنتی ہوگی اور اسپیکر منتخب وزیراعلیٰ کا باضابطہ اعلان کریں گے۔
قواعد کے مطابق اگر صرف ایک امیدوار میدان میں ہو اور اسے اسمبلی کے کل ارکان کی اکثریت حاصل ہو جائے تو وہ منتخب وزیر اعلیٰ قرار دیا جائے گا، تاہم مطلوبہ اکثریت نہ ملنے پر انتخابی عمل دوبارہ شروع کر دیا جائے گا۔
اگر ایک سے زیادہ امیدوار ہوں اور کسی بھی امیدوار کو پہلے بیلٹ میں اکثریت حاصل نہ ہو تو سب سے زیادہ ووٹ حاصل کرنے والے دو امیدواروں کے درمیان دوسرا بیلٹ ہوگا جس میں اکثریت حاصل کرنے والے امیدوار کو منتخب وزیر اعلیٰ قرار دیا جائے گا۔
یاد رہے کہ علی امین گنڈا پور نے وزیراعلیٰ خیبرپختونخوا کے عہدے سے استعفیٰ دے دیا ہے، گورنر فیصل کریم کنڈی نے استعفیٰ موصول ہونے کی تصدیق کی، گورنر ہاؤس کا کہنا ہے کہ علی امین گنڈا پور کا استعفیٰ قانون کے مطابق قبول کرنے کا فیصلہ پیر کو کیا جائے گا۔
گورنر فیصل کریم کنڈی نے واضح کیا ہے کہ علی امین گنڈا پور کا استعفیٰ منظور ہونے تک وہ وزیراعلیٰ رہیں گے۔ پی ٹی آئی نے سہیل آفریدی کو اپنا امیدوار نامزد کیا ہے۔
مزید پڑھیں:بعض ارکان کی نیت کی وجہ سے پارٹی کی سیاسی قوت متاثر ہوئی ہے، شیر افضل مروت
