لاہور(اے بی این نیوز) پنجاب اسمبلی میں حال ہی میں قائم کی گئی سیلاب کے حوالے سے خصوصی پارلیمانی کمیٹی کے کنوینئر علی حیدر گیلانی نے اپنے عہدے سے استعفیٰ دے دیا۔
استعفے میں علی حیدر گیلانی نے موقف اپنایا کہ انہیں بارباڈوس میں منعقد ہونے والی 68 ویں سی پی سی (کامن ویلتھ پارلیمنٹری کانفرنس) میں شرکت کے لیے جانا ہے۔ ان کا کہنا تھا کہ یہ ایک اہم بین الاقوامی اجلاس ہے جس میں پاکستان کی نمائندگی کے لیے ان کی موجودگی ضروری ہے۔ تاہم، وہ اس بات سے بھی آگاہ ہیں کہ سیلاب پارلیمانی کمیٹی کو فوری طور پر اپنا سروے مکمل کرنا ہے اور عملی سفارشات مرتب کرنی ہیں۔
انہوں نے وضاحت کی کہ ان کی غیر موجودگی کمیٹی کے کام میں رکاوٹ بن سکتی ہے اور اس کے ذمہ دارانہ عمل کو متاثر کرسکتی ہے۔ اسی بنیاد پر انہوں نے عہدہ چھوڑنے کا فیصلہ کیا تاکہ کمیٹی کی کارروائی بلا تعطل آگے بڑھ سکے۔
علی حیدر گیلانی نے سپیکر پنجاب اسمبلی سے درخواست کی ہے کہ کمیٹی کے لیے فوری طور پر ایک نیا کنوینئر مقرر کیا جائے تاکہ سیلاب سے متاثرہ علاقوں کے مسائل کا جائزہ لینے اور رپورٹ تیار کرنے کا عمل تاخیر کا شکار نہ ہو۔
یاد رہے کہ پنجاب میں حالیہ سیلابوں نے بڑے پیمانے پر تباہی مچائی ہے۔ اس صورتحال سے نمٹنے کے لیے پنجاب اسمبلی نے ایک خصوصی پارلیمانی کمیٹی قائم کی تھی تاکہ متاثرہ علاقوں کا سروے کیا جا سکے، امدادی سرگرمیوں کا جائزہ لیا جا سکے اور مستقبل میں بہتر حکمت عملی وضع کی جا سکے۔ اس کمیٹی کا مقصد سیلاب متاثرین کی مشکلات کم کرنے کے لیے فوری اور مؤثر اقدامات تجویز کرنا ہے۔
علی حیدر گیلانی کا کہنا تھا کہ وہ نہیں چاہتے کہ ان کی غیر موجودگی کمیٹی کے فعال کردار کو متاثر کرے۔ یہی وجہ ہے کہ انہوں نے ذاتی طور پر یہ فیصلہ کیا کہ کمیٹی کو ایک ایسا کنوینئر دیا جائے جو اس وقت مکمل طور پر دستیاب ہو اور توجہ کے ساتھ کام جاری رکھ سکے۔
مزید پڑھیں۔سونے کی قیمت میں اضافہ دیکھنے میں آیا اور یہ ایک نئی بلند ترین سطح پر پہنچ گیا
