اسلام آباد( اے بی این نیوز) وفاقی دارالحکومت اور راولپنڈی سمیت 5اضلاع کو سیف زون بنانے کیلئے غیر قانونی مقیم غیرملکیوں کیخلاف کریک ڈاؤن کا فیصلہ کر لیا گیا۔
غیر قانونی مقیم غیرملکیوں کیلئے انکا ڈیٹا مرتب کرنے، موبائل سم کا اجرا روکنے اور لین دین یا جائیداد کی خرید و فروخت کیلئے سٹامپ پیپرز کی فروخت پر پابندی لگانے کا فیصلہ کیا گیا ہے۔
اسلام آباد، راولپنڈی، اٹک، مری اور ہری پور کے ڈپٹی کمشنرز کو خصوصی ٹاسک سونپ دیئے گئے ہیں، چیف کمشنر اسلام آباد محمد علی رندھاوا کی زیر صدارت اجلاس ہوا جس میں غیر قانونی مقیم غیر ملکی افراد کیخلاف کارروائی کا فیصلہ کیا گیا۔
چیف کمشنر نے ہدایت کی ہے کہ غیر قانونی مقیم غیر ملکیوں کی مستقبل میں دوبارہ آبادکاری کو روکنے کیلئے پلان تشکیل دیا جائے، ان کا ڈیٹا تیار کیا جائے جس میں رہائشی، پتہ اور دیگر تفصیلات درج ہوں۔
5 اضلاع کو سیف زون بنانے کیلئے ایف آئی اے، نادرا کے ساتھ ڈیٹا شئیرنگ ہو گی، گھروں اور ہوٹلوں میں غیرملکی کرایہ داروں کے طور پر رجسٹر نہ ہونے والے افراد کیخلاف بھی کارروائی ہو گی، غیر ملکی افراد ویلڈ ویزے (اجازت نامہ) کے ساتھ قیام کر سکیں گے بصورت دیگر کارروائی ہو گی۔
مزید پڑھیں۔سونے کی قیمت میں ایک روز بعد ہی سیکڑوں روپے کی کمی
