پیرس(اے بی این نیوز)چین نے امریکا کی جانب سے ایران کی جوہری تنصیبات پر حملے کو عالمی امن کےلئے خطرناک مثال قرار دے دیا ہے۔ چینی وزیر خارجہ وانگ ای نے فرانسیسی وزیر خارجہ کے ہمراہ پیرس میں ایک مشترکہ پریس کانفرنس سے خطاب کرتے ہوئے کہا کہ ایک خود مختار ملک کی جوہری تنصیبات پر کھلم کھلا حملہ بین الاقوامی اصولوں کی کھلی خلاف ورزی ہے اور اس کے تباہ کن نتائج پوری دنیا کو بھگتنا پڑ سکتے ہیں۔
وانگ ای نے خبردار کیا کہ اگر اس واقعے کے نتیجے میں کوئی جوہری سانحہ پیش آتا تو اس کی قیمت صرف ایران ہی نہیں بلکہ پوری عالمی برادری کو چکانا پڑتی۔ انہوں نے کہا کہ ایران کے جوہری مسئلے کا مستقل اور پائیدار حل تب تک ممکن نہیں جب تک مشرق وسطیٰ کے بنیادی مسئلے یعنی فلسطین کو حل نہ کیا جائے۔
چینی وزیر خارجہ نے دوٹوک مؤقف اختیار کرتے ہوئے کہا کہ صرف ”دو ریاستی حل“ ہی مشرق وسطیٰ کے جاری بحران کا واحد عملی اور منصفانہ راستہ ہے۔ ان کا کہنا تھا کہ عالمی برادری کو اب محض بیانات سے آگے بڑھ کر اس مقصد کے لیے مؤثر اور عملی اقدامات کرنے ہوں گے۔
وانگ ای نے امریکا کے حالیہ اقدامات پر تنقید کرتے ہوئے کہا کہ ”پہلے طاقت پھر امن“ کا نظریہ دراصل طاقت کی منطق ہے جو عالمی استحکام کو متزلزل کرتی ہے۔ انہوں نے واضح کیا کہ طاقت کے استعمال سے امن حاصل نہیں کیا جا سکتا بلکہ اس سے صرف انتشار اور تصادم کو بڑھاوا ملتا ہے۔
مزید پڑھیں: اسرائیل کا یمن میں حوثیوں پر فضائی حملہ،بندرگاہوں کو نشانہ بنایا
