کراچی (اے بی این نیوز) سونے کی قیمت میں نمایاں کمی دیکھنے میں آئی ہے، جس سے زیورات خریدنے کے خواہشمند افراد اور سرمایہ کاروں کے چہروں پر خوشی کی لہر دوڑ گئی ہے۔ عالمی اور مقامی صرافہ مارکیٹوں میں سونے کی قیمت میں حالیہ دنوں میں ہونے والا اضافہ رک گیا ہے اور اب کمی کا رجحان سامنے آیا ہے۔

بین الاقوامی مارکیٹ میں سونے کی قیمت میں 26 ڈالر فی اونس کمی ہوئی ہے، جس کے بعد عالمی سطح پر فی اونس سونا 3331 ڈالر پر آگیا ہے۔ عالمی منڈی میں قیمت میں اس کمی کا براہِ راست اثر پاکستانی مارکیٹ پر بھی پڑا ہے۔

آل پاکستان صراف اینڈ جیولرز ایسوسی ایشن کی جانب سے جاری کردہ اعداد و شمار کے مطابق پاکستان میں 24 قیراط خالص سونے کی فی تولہ قیمت میں 2600 روپے کی کمی ریکارڈ کی گئی ہے، جس کے بعد نئی قیمت 351500 روپے ہو گئی ہے۔ اسی طرح، دس گرام سونے کی قیمت میں بھی نمایاں کمی دیکھنے میں آئی ہے اور یہ 2228 روپے کم ہو کر 301354 روپے پر پہنچ گئی ہے۔

سونے کی قیمت میں اس کمی کو ماہرین بین الاقوامی سطح پر معاشی اتار چڑھاؤ، امریکی ڈالر کی قدر میں تبدیلی اور تاجر برادری کے محتاط رویے سے جوڑ رہے ہیں۔ مقامی مارکیٹ میں قیمتوں میں یہ کمی عوام کے لیے ایک ریلیف کے طور پر دیکھی جا رہی ہے، خاص طور پر اُن افراد کے لیے جو شادی بیاہ یا دیگر تقریبات کے لیے سونا خریدنے کا ارادہ رکھتے ہیں۔صرافہ بازار کے تاجروں کا کہنا ہے کہ اگر یہی رجحان برقرار رہا تو آئندہ دنوں میں سونے کی قیمت مزید نیچے آ سکتی ہے، جو خریداروں کے لیے ایک اور خوشخبری ہو سکتی ہے۔

مزید پڑھیں :عمران خان کے کیسز کی سماعت کیوں نہیں ہوئی ،پی ٹی آئی کا کل پھر ریڈ زون میں احتجاج کا فیصلہ، جنید اکبر کو اہم ذمہ داری سونپ دی گئی