اسلام آباد ( اے بی این نیوز )چیف آف آرمی اسٹاف فیلڈ مارشل سید عاصم منیر، نشانِ امتیاز (ملٹری) کی جانب سے ایک پُروقار عشائیے کا اہتمام کیا گیا، جس کا مقصد “معرکہ حق” اور “آپریشن بنیان مرصوص” کے دوران سیاسی قیادت، مسلح افواج کے پختہ عزم، اور پاکستانی عوام کے ناقابل تسخیر جذبے کو خراجِ تحسین پیش کرنا تھا۔
اس باوقار تقریب میں صدرِ پاکستان جناب آصف علی زرداری، وزیرِ اعظم جناب محمد شہباز شریف، نائب وزیر اعظم/ وزیر خارجہ، چیئرمین سینیٹ، اسپیکر قومی اسمبلی، وفاقی وزراء، گورنرز، وزرائے اعلیٰ، چیئرمین جوائنٹ چیفس آف اسٹاف کمیٹی، پاک فضائیہ اور بحریہ کے سربراہان، بڑی سیاسی جماعتوں کی اعلیٰ قیادت، اعلیٰ سرکاری افسران، اور تینوں مسلح افواج کے سینئر افسران نے شرکت کی۔
تقریب کے شرکاء نے اس بصیرت افروز قیادت کو خراج تحسین پیش کیا جس نے قوم کو ایک فیصلہ کن لمحے میں درست سمت دی، افواجِ پاکستان کی جرات و قربانی کو سراہا، اور پاکستانی عوام کی ثابت قدم محب الوطنی کو سراہا۔
اپنے خطاب میں آرمی چیف نے “معرکہ حق” کے دوران سیاسی قیادت کی اسٹریٹجک دور اندیشی پر دلی شکریہ ادا کیا، اور “آپریشن بنیان مرصوص” میں تینوں افواج کے درمیان بے مثال رابطہ کاری کو سراہا جس نے آپریشنل کامیابی کو یقینی بنایا۔
انہوں نے بھارت کی جانب سے چلائی گئی ڈس انفارمیشن مہم کے خلاف پاکستانی نوجوانوں اور میڈیا کے غیر متزلزل کردار کو سراہتے ہوئے انہیں فولادی دیوار” قرار دیا جو منفی پروپیگنڈے کے خلاف ڈٹ کر کھڑے رہے۔ آرمی چیف نے پاکستانی سائنسدانوں، انجینئروں اور سفارتکاروں کی پیشہ ورانہ مہارت اور عزم کو بھی خراج تحسین پیش کیا جن کی خدمات تنازعے کے دوران کلیدی ثابت ہوئیں۔
یہ شام قومی اتحاد، عزمِ نو، اور مضبوط ہم آہنگی کے ساتھ ایک روشن مستقبل کی طرف بڑھنے کے اجتماعی عزم کی علامت کے طور پر یادگار بن گئی۔
