سو رینیام ( اے بی این نیوز      )سرینام کے سابق صدر ڈیسی بوٹرسے 79 سال کی عمر میں انتقال کر گئے ہیں، حکومت نے بدھ کے روز ان کے انتقال کی تصدیق کی۔

گزشتہ ہفتے سرینام کے حکام نے بوٹرسے کے گھر پر چھاپہ مارا تھا، جہاں ان کے حامی بدھ کی صبح ان کی تعزیت کے لیے جمع ہوئے تھے، تاہم سابق صدر وہاں موجود نہیں تھے۔

ڈیسی بوٹرسے 2010 سے 2020 تک سرینام کے صدر کے عہدے پر فائز رہے اور کئی دہائیوں تک ملکی سیاست میں نمایاں کردار ادا کرتے رہے۔ 1980 میں، انہوں نے ایک فوجی بغاوت کی قیادت کی، جس کے نتیجے میں سرینام میں فوجی حکمرانی کا آغاز ہوا جو 1987 تک جاری رہی۔

2010 کے پارلیمانی انتخابات میں ان کی جماعت “میگا کمبینیشن” نے کامیابی حاصل کی، اور وہ 19 جولائی 2010 کو صدر منتخب ہوئے۔ انہوں نے پارلیمنٹ کے 50 اراکین میں سے 36 ووٹ حاصل کیے اور 12 اگست 2010 کو باضابطہ طور پر عہدہ سنبھالا۔

2019 میں، بوٹرسے کو 1982 میں 15 سیاسی کارکنوں کے قتل میں ملوث پایا گیا تھا۔ ان مقتولین میں وکلاء، صحافی، یونین لیڈر، فوجی اور یونیورسٹی کے اساتذہ شامل تھے۔ انہیں اس جرم میں 20 سال قید کی سزا سنائی گئی۔ بوٹرسے نے دعویٰ کیا کہ یہ افراد ایک منصوبہ بند حملے سے وابستہ تھے۔

جنوری میں عدالت نے انہیں جیل میں رپورٹ کرنے کا حکم دیا، لیکن وہ مقررہ تاریخ پر حاضر نہیں ہوئے۔ ان کی جماعت کے ارکان نے کہا ہے کہ سابق صدر کے خاندان کے افراد بدھ کو تفصیلات جاری کریں گے۔ ڈیسی بوٹرسے کی وفات ایک متنازعہ شخصیت کی موت ہے، جنہوں نے ملکی سیاست پر گہرا اثر چھوڑا اور کئی تنازعات میں گھرے رہے۔

مزید پڑھیں :سکولوں کی فیسوں کے حوالے سے بڑی خبر آگئی،اہم ہدایات جاری،جانئے کیا