اسلام آباد(نیوز ڈیسک )پاکستان تحریک انصاف (پی ٹی آئی) کی قیادت نے آج اسلام آباد کے ترنول چوک پر پارٹی کے پاور شو کی اجازت معطل کرنے کے اسلام آباد ضلعی انتظامیہ کے فیصلے کو چیلنج کر دیا ہے۔
اس حوالے سے پی ٹی آئی کی جانب سے اسلام آباد ہائی کورٹ میں ضلعی انتظامیہ اسلام آباد کے خلاف توہین عدالت کی درخواست دائر کی گئی ہے۔درخواست اپوزیشن لیڈر عمر ایوب کے ساتھ بیرسٹر گوہر، عمیر نیازی، شہریار آفریدی، ثناء اللہ مستی خیل اور شاہد خٹک نے جمع کرائی۔درخواست میں پی ٹی آئی نے موقف اختیار کیا کہ ترنول جلسے کا این او سی معطل کرنا توہین عدالت کے مترادف ہے۔
درخواست میں کہا گیا ہے کہ پولیس کی ایک ٹویٹ کے ذریعے ہمیں معلوم ہوا کہ این او سی منسوخ کر دیا گیا ہے۔درخواست میں استدعا کی گئی ہے کہ عدالت ریلی کی اجازت دینے کے احکامات جاری کرے اور متعلقہ فریقین کو عدالتی احکامات پر عمل کرنے کی ہدایت کرے۔ اس میں پی ٹی آئی کارکنوں کو ہراساں کرنے سے روکنے کے احکامات بھی مانگے گئے ہیں۔
اسلام آباد کے چیف کمشنر نے جمعہ کو پاکستان تحریک انصاف (پی ٹی آئی) کو طے شدہ اجلاس سے ایک روز قبل ترنول میں عوامی اجتماع کے لیے جاری کیا گیا نو آبجیکشن سرٹیفکیٹ (این او سی) معطل کردیا۔تفصیلات کے مطابق یہ فیصلہ اسلام آباد کے چیف کمشنر کی زیر صدارت اجلاس کے دوران کیا گیا، جس میں سیکیورٹی اداروں نے عوامی اجتماع سے متعلق ممکنہ خطرات کے بارے میں اپنے تحفظات کا اظہار کیا۔
مزید پڑھیں: آ ج6جولائی بروزہفتہ2024 پاکستان کے مختلف شہروں میں سونے کی قیمت
