کراچی(نیوز ڈیسک ) ملکی تاریخ میں پہلی بار پاکستان سے پیاز کی برآمد 210 ملین ڈالر سے تجاوز کر گئی ہے جب کہ رواں سال کے آخر تک مذکورہ برآمدات 250 ملین ڈالر تک پہنچ جائیں گی جو کہ ایک ریکارڈ ہے۔
مزید پڑھیں: پشاور ، بجلی کی لوڈشیڈنگ کیخلاف احتجاج، گرڈ اسٹیشن کا کنٹرول سنبھال لیں گے،مظاہرین
پاکستان فروٹ اینڈ ویجیٹیبل ایکسپورٹرز ایسوسی ایشن کے ترجمان نے کہا کہ ملکی تاریخ میں پہلی بار پیاز کی برآمدات ریکارڈ سطح پر پہنچ گئی ہیں جو کہ پھلوں اور سبزیوں سمیت کسی بھی مصنوعات کی تاریخ میں سب سے زیادہ ہے۔
ترجمان کے مطابق جولائی 2023 سے اپریل 2024 تک ملک سے پیاز کی برآمدات 210 ملین ڈالر سے زائد ریکارڈ کی گئیں جب کہ اس سے قبل ملکی تاریخ میں صرف اورنج کی زیادہ برآمدات ہوئی تھیں جو 210 ملین ڈالر تھیں۔ انہوں نے کہا کہ اس سال کے آخر تک پیاز کی برآمد 250 ملین ڈالر تک پہنچ جائے گی۔
بیان کے مطابق بھارتی پیاز کی برآمد پر پابندی کے باعث پاکستان کو نئی منڈیاں مل گئی ہیں اور اب پاکستانی پیاز نے مشرق بعید اور مشرق وسطیٰ سمیت دنیا کی بڑی منڈیوں تک رسائی حاصل کر لی ہے۔
انہوں نے مزید کہا کہ دنیا کے ٹاپ سٹورز میں بھی پاکستانی پیاز آج فروخت کے لیے دستیاب ہیں۔ حکومت کو پیاز کی شیلف لائف بڑھانے کے لیے فوری اقدامات کرنے ہوں گے کیونکہ آنے والے وقت میں پاکستانی پیاز کے لیے نئی منڈیاں تیار ہو سکتی ہیں۔
