لاہور( اے بی این نیوز)پراونشل ڈیزاسٹر منیجمنٹ اتھارٹی نے صوبے کے بالائی علاقوں میں مون سون بارشوں کے 9ویںا سپیل کے لیے الرٹ جاری کیا ہے، جس میں موسلادھار شدید بارش کا امکان ہے۔

ترجمان پی ڈی ایم اے کے مطابق 29 اگست سے 2 ستمبر تک پنجاب کے بیشتر اضلاع میں شدیدبارش کی پیش گوئی کی گئی ہے۔

ترجمان پی ڈی ایم اے کا کہنا ہے کہ راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ، ڈیرہ غازی خان، ملتان اور راجن پور میں بارش کا امکان ہے۔

ڈی جی پی ڈی ایم اے عرفان علی کاٹھیا نے صوبے بھر کے کمشنرز اور ڈپٹی کمشنرز کو الرٹ رہنے کی ہدایات جاری کرتے ہوئے کہا کہ وزیراعلیٰ پنجاب کی ہدایات کے مطابق ضلعی انتظامیہ کو الرٹ جاری کر دیا گیا ہے۔

انہوں نے کہا کہ مون سون کی بارشوں کے باعث پنجاب کے دریاؤں اور ان سے ملحقہ ندی نالوں میں طغیانی کی صورتحال ہے اور دریائے چناب، راوی اور ستلج میں انتہائی اونچے درجے کا سیلاب ہے۔

ڈی جی پی ڈی ایم اے نے کہا کہ مون سون کی بارشوں کے باعث بڑے شہروں میں ندی نالوں اور ندی نالوں میں پانی بہ سکتا ہے اس لیے ڈپٹی کمشنرز اور دیگر افسران بھی فیلڈ میں موجود رہیں۔

انہوں نے کہا کہ محکمہ صحت، آبپاشی، تعمیرات و مواصلات، لوکل گورنمنٹ اور لائیو سٹاک کو الرٹ جاری کر دیا گیا ہے۔

ڈی جی پی ڈی ایم اے نے کہا کہ شہریوں سے گزارش ہے کہ خراب موسم میں احتیاطی تدابیر اختیار کریں، آندھی اور طوفان کی صورت میں محفوظ مقامات پر رہیں اور غیر ضروری سفر سے گریز کریں۔

عرفان علی کاٹھیا نے کہا کہ عوام گرج چمک اور آندھی کے دوران کبھی بھی کھلے آسمان تلے نہ نکلیں اور ہنگامی صورت حال میں پی ڈی ایم اے کی ہیلپ لائن 1129 پر رابطہ کریں۔
مزید پڑھیں:گووندا صرف میرا ، کوئی اسے مجھ الگ نہیں کر سکتا،سنیتا آہوجا