لاہور(اے بی این نیوز) این ڈی ایم اے کے این ای او سی نے پنجاب اور آزاد کشمیر کے مختلف اضلاع میں موسلادھار بارشوں کا الرٹ جاری کر دیا ہے۔

اے بی این نیوز کے مطابق پنجاب میں گجرات، گوجرانوالہ، سیالکوٹ، نارووال، لاہور اور قصور میں موسلادھار بارش کا امکان ہے۔ آئندہ 24 گھنٹوں کے دوران جہلم، چکوال، منڈی بہاؤالدین، حافظ آباد، ننکانہ صاحب، چنیاں اور پاکپتن میں موسلادھار بارش کا امکان ہے۔

الرٹ میں کہا گیا ہے کہ شہری اور نشیبی علاقوں میں سیلاب آنے کا خدشہ ہے جس میں ندیوں اور نہروں کے بہہ جانے کا امکان ہے۔ موسلادھار بارشوں کے باعث پہاڑی علاقوں میں لینڈ سلائیڈنگ اور سیلاب کا بھی خدشہ ہے۔

اسی طرح حویلیاں سمیت آزاد کشمیر کے اضلاع وادی نیلم، باغ، کوٹلی، راولاکوٹ، مظفرآباد میں آئندہ 24 گھنٹوں کے دوران وقفے وقفے سے بارش کا امکان ہے۔

الرٹ میں کہا گیا ہے کہ بارشوں کے باعث نشیبی علاقوں میں طغیانی، دریاؤں اور ندی نالوں کے بہہ جانے اور پہاڑی علاقوں میں لینڈ سلائیڈنگ کا خطرہ ہے۔ پہاڑی ندی نالوں میں پانی کا تیز بہاؤ رابطہ سڑکوں پر ٹریفک کی روانی کو متاثر کر سکتا ہے۔ دریائے ستلج کے بہاؤ میں اضافے اور ممکنہ سیلابی صورتحال کے پیش نظر این ڈی ایم اے کا الرٹ پہلے سے ہی نافذ ہے۔

متعلقہ اداروں نے ستلج کے قریب علاقوں میں بڑے پیمانے پر انخلاء کی کارروائیاں شروع کر دی ہیں۔ پی ڈی ایم اے پنجاب، ریسکیو 1122 اور پاک فوج کے انجینئر سیلاب کی صورتحال سے نمٹنے کے لیے امدادی کارروائیوں میں مصروف ہیں۔

الرٹ میں کہا گیا ہے کہ عوام ٹی وی، ریڈیو، موبائل الرٹس اور پاک این ڈی ایم اے ڈیزاسٹر الرٹ ایپ کے ذریعے جاری کردہ الرٹس اور ہدایات پر عمل کریں اورعوام دریاؤں، ندی نالوں اور نشیبی علاقوں سے دور رہیں اور غیر ضروری سفر سے گریز کریں۔
مزید پڑھیں:عمران خان نے میرا استعفیٰ قبول نہیں کیا، سلمان اکرم راجہ