کراچی ( اے بی این نیوز)سمندری طوفان شکتی مزید شدت اختیار کر گیا ہے، یہ کراچی سے تقریباً 390 کلومیٹر جنوب مغرب میں واقع ہے۔
طوفان کے زیر اثر آج بدین، ٹھٹھہ، سجاول، جامشورو، حب، لسبیلہ، آواران، کیچ اور کراچی میں چند مقامات پر تیز ہواؤں اور گرج چمک کے ساتھ ہلکی سے درمیانی بارش کا امکان ہے۔
محکمہ موسمیات کے مطابق سمندری طوفان شکتی شمال مشرقی بحیرہ عرب میں واقع ہے۔
سمندری طوفان شکتی مزید شدت اختیار کر کے شدید سمندری طوفان میں تبدیل ہو گیا ہے جو کل تک شمال مغربی اور وسطی شمالی بحیرہ عرب تک پہنچ جائے گا۔
اس کے بعد یہ اپنا رخ بدل کر مشرق-شمال مشرق کی طرف مڑ جائے گا اور اگلے 24 گھنٹوں میں آہستہ آہستہ کمزور ہونا شروع ہو جائے گا۔
طوفان کے باعث سندھ کے ساحلی علاقوں کے قریب سمندری حالات شدید ہو سکتے ہیں، 40 سے 55 کلومیٹر فی گھنٹہ کی رفتار سے ہوائیں چل سکتی ہیں۔
محکمہ موسمیات نے ماہی گیروں کو ہدایت کی ہے کہ وہ 5 اکتوبر تک گہرے سمندر میں جانے سے گریز کریں۔
مزید پڑھیں:سعودی فٹ بال ٹیم نے چھٹی بار گلف کپ کا ٹائٹل جیت لیا
