امریکا( اے بی این نیوز)صدر ڈونلڈ ٹرمپ کی انتظامیہ کے خلاف امریکا کے مختلف شہروں میں ’نو کنگز‘ کے عنوان سے ملک گیر احتجاج جاری ہے جس میں لاکھوں افراد سڑکوں پر نکل آئے ہیں جب کہ چھوٹے شہروں میں درجنوں ریلیاں بھی نکالی جا رہی ہیں۔
سی این این کے مطابق ملک بھر میں 2500 سے زائد مظاہرے متوقع ہیں جن میں لاکھوں افراد شریک ہوں گے۔
مظاہرین کا کہنا ہے کہ صدر ٹرمپ آمریت اور فوجی جبر کی طرف بڑھ رہے ہیں۔
امریکی میڈیا کے مطابق صدر ٹرمپ کی جانب سے تارکین وطن کو ڈی پورٹ کرنے کے لیے چھاپوں اور مختلف ریاستوں میں فوج کی تعیناتی پر عوام میں شدید غم و غصہ پایا جاتا ہے۔
امریکی میڈیا کے مطابق ٹرمپ انتظامیہ کی پالیسیوں کے خلاف ملک بھر میں مظاہروں میں شدت آتی جا رہی ہے، مظاہروں کا دائرہ وسیع ہونے کا امکان ہے۔
واضح رہے کہ یہ مظاہرے ایک ایسے وقت میں ہو رہے ہیں جب وفاقی حکومت شٹ ڈاؤن کی لپیٹ میں ہے، بجٹ بل پر ریپبلکن قانون ساز اور وائٹ ہاؤس ڈیموکریٹس کے ساتھ تعطل کا شکار ہیں، جس سے حکومتی امور ٹھپ ہو کر رہ گئے ہیں۔
مزید پڑھٰیں:سیکیورٹی فورسز کی بڑی کارروائی، 70 فتنہ الخوارج ہلاک
