ممبئی( نیوز ڈیسک) بھارت نے 25 اگست سے امریکا کے لئے پوسٹل سروس معطل کرنے کا اعلان کردیا۔

بھارتی زرائع ابلاغ کے مطابق بھارت کی وزارت مواصلات کے تحت محکمہ ڈاک نے اعلان کیا ہے کہ 25 اگست سے امریکا جانے والی تمام پوسٹل اشیاء کی بکنگ عارضی طور پر معطل کر دی جائے گی۔

اس فیصلے کے تحت صرف خطوط، دستاویزات اور 100 امریکی ڈالر تک مالیت کے تحائف کی بکنگ جاری رہے گی۔

یہ اقدام امریکی کسٹمز قوانین میں تبدیلی کے بعد کیا گیا ہے، جو اس ماہ کے آخر سے نافذ العمل ہوں گے۔

امریکی انتظامیہ نے 30 جولائی کو ایگزیکٹو آرڈر نمبر 14324 جاری کیا تھا، جس کے تحت 800 امریکی ڈالر تک کی اشیاء کے لیے دی جانے والی ڈیوٹی فری کم از کم چھوٹ ختم کر دی گئی ہے۔

محکمہ ڈاک نے اپنے صارفین سے معذرت کرتے ہوئے کہا ہے کہ جو ڈاک اشیاء پہلے سے بک ہوچکی ہیں اور امریکا بھیجی نہیں جا سکتیں، ان کے پوسٹیج کی رقم واپس لی جا سکتی ہے۔

محکمہ ڈاک کا کہنا ہے کہ وہ صورتحال پر گہری نظر رکھے ہوئے ہے اور متعلقہ اسٹیک ہولڈرز کے ساتھ تعاون سے جلد از جلد خدمات کو معمول پر لانے کی کوشش کرے گا۔
مزید پڑھیں:پیپلزپارٹی رہنما اقربا فاطمہ،ایس ایس پی توحید الرحمٰن میمن کے گھر سب سےبڑی ڈکیتی