پشاور(اے بی این نیوز)خیبر پختونخوا کے مشیر اطلاعات بیرسٹر محمد علی سیف نے کہا ہے کہ افغان بھائیوں کو مشکل وقت میں کبھی تنہا نہیں چھوڑیں گے۔
بیرسٹر سیف نے افغان قونصلیٹ کا دورہ کیا اور وہاں حکام سے ملاقات میں زلزلے سے ہونے والے نقصانات پر افسوس کا اظہار کیا۔
اس موقع پر افغان قونصل جنرل نے مشکل وقت میں مدد کرنے پر خیبرپختونخوا حکومت کا شکریہ ادا کیا اور کہا کہ طورخم بارڈر پر 100 سے زائد زخمی مریض پشاور آنا چاہتے ہیں۔
جس پر خیبرپختونخوا کے مشیر اطلاعات نے مریضوں کو پشاور کے ہسپتالوں تک رسائی کی یقین دہانی کرائی۔
بیرسٹر سیف کا کہنا ہے کہ وزیر اعلیٰ علی امین گنڈا پور بھی زلزلے میں زخمی ہونے والوں کے علاج کے حوالے سے فکر مند ہیں اور اس سلسلے میں وزارت خارجہ سے مسلسل رابطے میں ہیں۔
انہوں نے مزید کہا کہ سرحد پر مریضوں کو پشاور لانے کے لیے بھرپور کوششیں کی جا رہی ہیں اور وہ افغان بھائیوں کو مشکل وقت میں کبھی تنہا نہیں چھوڑیں گے۔
خیبر پختونخوا کے مشیر اطلاعات نے یہ بھی کہا کہ ضرورت پڑنے پر پشاور سے ماہر ڈاکٹروں کو ضروری طبی آلات کے ساتھ جلال آباد بھیجا جا سکتا ہے۔
مزید پڑھیں:مینگورہ اور گردونواح میں 4 اعشاریہ 4 شدت کا زلزلہ، عوام میں خوف وہراس
