کوئٹہ(اے بی این نیوز)بلوچستان کے علاقے مچھ میں کوئلے کی کان میں زہریلی گیس بھرنے سے 3 کان کن جاں بحق ہوگئے۔

ریسکیو حکام کے مطابق بلوچستان کے ضلع بولان کی تحصیل مچھ کے علاقے ڈیگاری میں افسوسناک حادثہ کوئلے کی کان میں زہریلی گیس بھرنے سے پیش آیا، جس کے نتیجے میں 3 کان کن دم گھٹنے سے موقع پر ہی جاں بحق ہوگئے۔

مزدور زیر زمین کان میں کام میں مصروف تھے کہ اچانک ان میں زہریلی گیس بھر گئی جس سے وہ بے ہوش ہو گئے اور زندہ بچ نہ سکے۔ جاں بحق ہونے والوں میں ایک مزدور کا تعلق کوئٹہ کے علاقے ہزارہ ٹاؤن جبکہ 2 کا تعلق علمدار روڈ ماری آباد سے بتایا جاتا ہے۔

واقعے کی اطلاع ملتے ہی مقامی انتظامیہ، ریسکیو ٹیمیں اور متعلقہ حکام موقع پر پہنچ گئے جب کہ چیف انسپکٹر مائنز اینڈ منرل عبدالغنی نے حادثے کی نوعیت اور ابتدائی وجوہات کا جائزہ لیا۔
مزید پڑھیں:پنجاب بھر سمیت آزاد کشمیر میں موسلادھار بارشیں ، سیلاب اور طغیانی کا الرٹ جاری