ملتان(اے بی این نیوز   )سینئر نائب صدر و چیف آرگنائزر مسلم لیگ ن مریم نواز کا کہنا ہے کہ آج ہمارے ہاتھ بندھے ہوئے ہیں، آئی ایم ایف معاہدے کی شرائط بہت کڑی ہیں، عمران خان نے پاکستان کو آئی ایم ایف کے ہاتھوں گروی رکھ دیا اور جاتے جاتے آئی ایم ایف معاہدے کو پھاڑ کر پھینک گئے ، 2016میں نوازشریف نے آئی ایم ایف پروگرام کو خدا حافظ کہہ دیا تھا، آئی ایم ایف کہتا ہے پہلے قیمتیں بڑھائیں پھر قرض ملے گا ہماری مجبوری ہے کہ آئی ایم ایف کی شرائط ماننا پڑیں گی ۔میڈیا سے گفتگو کرتے ہوئے کہا کہ شہبازشریف کی حکومت وفاق میں ہے، پنجاب ،خیبرپختونخوا حکومت چند دن پہلے تک عمران خان کے پاس تھی، مجھے سمجھ نہیں آتی مہنگائی کا ذمہ دار صرف شہبازشریف کیوں ہے؟،عمران خان کوترقی کرتا پاکستان ملا تھا ، جس کو تباہ کر دیا گیا، شہباز شریف دن رات کام کر رہے ہیں ، یہ پچھلی حکومت کی نااہلی ہے لیکن وعدہ کر رہے ہیں کہ حالات کو بہتر کریں گے۔مریم نواز نے عمران خان کی جیل بھرو تحریک پر بات کرتے ہوئے کہا کہ ہم انتظار کررہے ہیں، اپنی آنکھیں اور نظریں بچھا کر بیٹھیں ہیں آپ کو بھی پتہ چلے جیل کیا ہوتی ہے ؟ جیل بھرو تحریک کی شروعات زمان پارک سے کریں، فرنٹ لائن پر انہوں نے خواتین کو رکھا ہوا ہے، خود سامنے آئیں۔سینئر نائب صدر مسلم لیگ ن نے گزشتہ حکومت پر تنقید کرتے ہو ئے کہا کہ پی ٹی آئی فارن فنڈ صاف شفاف کیس ہے مگر ابھی تک احتساب نہیں ہو سکا، یہ نہیں ہو سکتا کہ عمران خان جرائم کریں اور اُن کو چھوڑ دیا جائے ۔انہوں نے کہا کہ وہ وقت دور نہیں جب ہم انصاف کا معیار دیکھیں گے، ان کو تو ابھی تک ہاتھ ہی نہیں لگے کسی نے انگلی تک نہیں لگائی، رانا ثنا اللہ 6ماہ جعلی مقدمے میں قید بھگت کر آئے، ، یہ 2دن کی قید میں پولیس والوں کے گلے لگ کر رونے لگے۔مریم نوازنے کہا کہ نواز شریف کو 2017 میں ایک اقامہ پر نکالا گیا، پانامہ کیس میں ہفتہ میں پانچ دن پیشی پر ہوتے تھے، ایک دن میں دو دو بار عدالت جاتے، دوسری طرف اقامہ نہیں ہیرے اور فارن فنڈنگ ہے، ناجائز پیسے کے ثبوت بھرے پڑے ہیں، آج بدنام زمانہ کیس میں بھی وہ عدالت نہیں آتے، ایسی سہولت کیا نواز شریف کو تھی، کیا یہ سہولت مریم کو تھی، سب جانتے ہیں کیسز جھوٹے تھے ہمارے ساتھ انتقام لیا گیا۔