لاہور (نیوز ڈیسک) سپریم کورٹ نےرہائشی علاقے میں ایل پی جی سٹوریج پلانٹ کی تنصیب کےخلاف اپیل کی سماعت میں اوگرا کے ذمہ دار افسر کواج 28دسمبر کوریکارڈ سمیت ذاتی حیثیت میں طلب کرلیا۔جسٹس سید منصور علی شاہ کی سربراہی میں تین رکنی فل بنچ نے لاہور رجسٹری میں کیس پر سماعت کی۔ فاضل عدالت نے دوران کیس کی سماعت میں استفسار کیا کہ اوگرا نے کس قانون کے تحت این اوسی جاری کیا قانون میں واضح ہے کہ رہائشی علاقے میں ایک سو میٹر تک یہ پلانٹ نہیں لگ سکتا اوگرا نے اپنا کام پوری طرح سے سرانجام دیا نہیں عدالت جاننا چاہتی ہے جس پر ایڈیشنل اٹارنی جنرل نے عدالت کو بتایا کہ انڈسٹریل ایریا میں اس قانون کا اطلاق نہیں ہوتا جس پر فاضل عدالت نے ریمارکس دیئے کہ یہ معاملہ تو بے قابو علاقے سے متعلق ہے جہاں گھر، کمرشل بلڈنگز اور کھیت موجود ہیں۔
